தமிழக மின்வாரியத்தில் 8000 காலியிடங்கள்! TANGEDCO-வில் Field Assistant பணிக்கு அதிரடி அரசாணை வெளியீடு!

RK October 29, 2026 1 minute read

சென்னை: தமிழ்நாடு மின் பகிர்மானக் கழகத்தில் (TANGEDCO) காலியாக உள்ள 8,000 ஃபீல்டு அசிஸ்டன்ட் (Field Assistant) பணியிடங்களை டிஎன்பிஎஸ்சி (TNPSC) மூலம் நேரடி நியமனம் மூலம் நிரப்பத் தமிழ்நாடு அரசு அதிரடி அரசாணையை வெளியிட்டுள்ளது. முதன்மைச் செயலாளர் அனில் மெஷ்ராம் இதற்கான உத்தரவைப் பிறப்பித்துள்ளார்.

இரண்டு கட்டங்களாக நேரடி நியமனம்:

தமிழ்நாடு மின் பகிர்மானக் கழகத் தலைவரின் கோரிக்கையை ஏற்று அரசு இந்த அனுமதியை வழங்கியுள்ளது. இதன்படி:

1-ஆம் கட்டம் (2027): 2027-ஆம் ஆண்டு காலண்டர் ஆண்டில் 5,000 பணியிடங்கள் நிரப்பப்படும்.
2-ஆம் கட்டம் (2028): 2028-ஆம் ஆண்டு காலண்டர் ஆண்டில் 3,000 பணியிடங்கள் நிரப்பப்படும்.
மொத்தம் 8,000 பணியிடங்களும் TNPSC மூலமாக வெளிப்படைத்தன்மையுடன் நேரடி நியமனம் செய்யப்படும்.

சம்பளம் மற்றும் படிகள் விவரம்:

இப்பணிக்குத் தேர்ந்தெடுக்கப்படுவோருக்குச் சம்பளம் மற்றும் படிகள் குறித்த முழு விவரம் அரசாணையில் வெளியிடப்பட்டுள்ளது:

அடிப்படைச் சம்பளம் (Basic Pay): ரூ.18,800 – 59,900
அகவிலைப்படி (DA @ 60%): ரூ.11,280
வீட்டு வாடகைப்படி (HRA): ரூ.1,800
நகர நஷ்ட ஈட்டுப்படி (CCA): ரூ.360
மருத்துவப் படி: ரூ.300
பங்களிப்பு ஓய்வூதியத் திட்டம் (CPS – Employer Share): ரூ.3,008
ஒருவருக்கான மொத்த மாதச் சம்பளம்: ரூ.35,548

அரசுக்கு ஆகும் நிதிச்சுமை:

2027-ல் நியமிக்கப்படும் 5,000 பேருக்கு மாதந்தோறும் ரூ.17,77,40,000 செலவிடப்படுவதன் மூலம், வருடத்திற்கு ரூ.213.28 கோடி செலவாகும்.
2028-ல் நியமிக்கப்படும் 3,000 பேருக்கு மாதந்தோறும் ரூ.10,66,44,000 செலவிடப்படுவதன் மூலம், வருடத்திற்கு ரூ.127.97 கோடி செலவாகும்.
ஆகமொத்தம் 8,000 பணியாளர்களுக்கு அரசு தரப்பிலிருந்து ஆண்டுக்கு ரூ.341.26 கோடி நிதி ஒதுக்கீடு செய்யப்பட்டுள்ளது.

இளைஞர்களுக்குப் பெரும் வாய்ப்பு:

மின்வாரியத்தில் களப்பணிகள், மின் பழுதுபார்த்தல் மற்றும் பராமரிப்புப் பணிகளுக்காக நிரந்தர அரசுப் பணியாக இது அமைகிறது. ஐ.டி.ஐ (ITI) மற்றும் டிப்ளமோ (Diploma) முடித்த தமிழக இளைஞர்களுக்கு இது மிகப்பெரிய வாய்ப்பாக அமையும். கல்வித் தகுதி மற்றும் வயது வரம்பு குறித்த அதிகாரப்பூர்வ அறிவிப்பை TNPSC விரைவில் வெளியிடும் என எதிர்பார்க்கப்படுகிறது.