வடகிழக்கு பருவமழை துவங்கியுள்ளதைத் தொடர்ந்து, தமிழகம் மற்றும் காரைக்கால் பகுதிகளில் அடுத்த 5 நாட்களுக்கு கனமழை எச்சரிக்கை விடுக்கப்பட்டுள்ளது.
சென்னை: தமிழகம் உட்பட தென்னிந்திய பகுதிகளில் வடகிழக்கு பருவமழை அதிகாரப்பூர்வமாக தொடங்கியுள்ளதாக இந்திய வானிலை ஆய்வு மையம் (IMD) அறிவித்துள்ளது. இதன் காரணமாக, தமிழகத்தில் அடுத்த 5 நாட்களுக்கு பரவலானது முதல் கனமழை பெய்ய வாய்ப்புள்ளதாக எச்சரிக்கை விடுக்கப்பட்டுள்ளது.
தென்மேற்கு பருவமழை முழுமையாக விலகியதைத் தொடர்ந்து, வளிமண்டல சுழற்சி மற்றும் சாதகமான சூழல் காரணமாக வடகிழக்கு பருவமழை தீவிரமடைந்துள்ளது. தமிழகம் தவிர புதுச்சேரி, காரைக்கால், கேரளா மற்றும் தெற்கு கர்நாடக பகுதிகளிலும் பருவமழை தொடங்கியுள்ளது.
இந்த மாவட்டங்களில் மிக கனமழை எச்சரிக்கை
மத்திய கேரளா மற்றும் குமரிக்கடல் பகுதிகளின் மேல் நிலவும் வளிமண்டல சுழற்சி காரணமாக, தமிழகத்தின் பல மாவட்டங்களில் பலத்த மழை பெய்யக்கூடும் எனத் தெரிவிக்கப்பட்டுள்ளது.
- மிக கனமழை எச்சரிக்கை: கோவை, நீலகிரி, தேனி மற்றும் விருதுநகர் மாவட்டங்கள்.
- கனமழை வாய்ப்பு: சென்னை, தாம்பரம், காஞ்சிபுரம், திருப்போரூர், கல்பாக்கம், சேலம், நாமக்கல் மற்றும் காவிரி டெல்டா மாவட்டங்கள்.
மேலும், ஆந்திராவின் திருப்பதி, விசாகப்பட்டினம் மற்றும் கர்நாடகாவின் மேற்குத் தொடர்ச்சி மலைப் பகுதிகளிலும் பரவலாக மழை பெய்யக்கூடும் என வானிலை மையம் கணித்துள்ளது.
விவசாயிகளுக்கு சாதகமான சூழல்
தற்போது வீசி வரும் கிழக்கத்திய காற்று மற்றும் வளிமண்டல சுழற்சி காரணமாக ஒரே அடியாக கொட்டித் தீர்க்காமல், சீரான இடைவெளியில் பரவலாக மழை பெய்து வருகிறது. இந்த சீரான மழைப்பொழிவு மண்ணின் ஈரப்பதத்தை அதிகரித்து, விவசாயத்திற்கு மிகவும் பயனுள்ளதாக இருக்கும் என வானிலை வல்லுநர்கள் தெரிவித்துள்ளனர்.
அரசு தீவிர முன்னெச்சரிக்கை நடவடிக்கை
பருவமழை தொடக்கத்தை அடுத்து, முன்னெச்சரிக்கை நடவடிக்கைகள் குறித்து சென்னையில் அமைச்சர்கள் மற்றும் அரசு உயர் அதிகாரிகள் தீவிர ஆலோசனை நடத்தினர்.
மழையினால் அதிகம் பாதிக்கப்படக்கூடிய இடங்கள், தாழ்வான பகுதிகள் மற்றும் சென்னையில் மேற்கொள்ள வேண்டிய பாதுகாப்பு நடவடிக்கைகள் குறித்து இந்த கூட்டத்தில் விவாதிக்கப்பட்டது. பொதுமக்கள் வானிலை அறிவிப்புகளை தொடர்ந்து கவனித்து விழிப்புடன் இருக்குமாறு கேட்டுக்கொள்ளப்பட்டுள்ளனர்.
About the Author
